28 مئی یومِ تکبیر کے موقع پر نارووال سپورٹس کمپلیکس کا افتتاح، PCB الیون اور لاہور قلندرز کا نمائشی T10 میچ میں ٹاکرا ہوگا

28 مئی یومِ تکبیر کے موقع پر نارووال سپورٹس کمپلیکس کا افتتاح ہوگا، PCB الیون اور لاہور قلندرز کا نمائشی T10 میچ میں ٹاکرا ہوگا

وفاقی وزیر احسن اقبال کی زیرِ صدارت اجلاس میں میچ کے انعقاد کے متعلق فیصلہ کیا گیا جس میں وزیراعظم شہباز شریف بھی شرکت کریں گے۔

میچ کے لیے کھلاڑیوں کا انتخاب کر لیا گیا ہے جن میں فخر زمان اور حارث رؤف جیسے پاکستان کے اسٹار پلیئرز ایکشن میں ہوں گے۔

فخر اور حارث کے علاوہ طاہر بیگ، جلات خان، احسن بھٹی، احمد دانیال اور پلیئرز ڈویلپمنٹ پروگرام کے کچھ کھلاڑی لاہور قلندرز کے اسکواڈ کا حصہ ہوں گے۔

پی سی بی الیون کے لیے کامران اکمل، عابد علی، آصف علی، ساجد خان، علی عمران اور عثمان قادر کا انتخاب کیا گیا ہے۔ علاوہ ازیں خوشدل شاہ، عباس آفریدی، محمد الیاس، محمد اخلاق اور عامر حسن کو بھی موقع فراہم کیا جائے گا۔

اس میچ کا انعقاد پاکستان سپورٹس بورڈ کی جانب سے کیا جائے گا۔ نارووال اسپورٹس کمپلیکس اسٹیڈیم میں بیک وقت 10,000 سے زائد تماشائیوں کی گنجائش ہے۔

نارووال اسپورٹس کمپلیکس ایک جدید ترین اسپورٹس کمپلیکس ہے جس میں کرکٹ، فٹ بال، ہاکی، والی بال، اسکواش، ٹیبل ٹینس، لان ٹینس، بیڈمنٹن سمیت مختلف کھیلوں کے لیے 14 اسٹیڈیم اور جمنازیم شامل ہیں۔