گدھا محنتی جانور ہے، کرپٹ سیاستدانوں سے تشبیہ نہ دی جائے، بیرسٹر کے خلاف درخواست دائر

  

وکیل سروان بھٹی نے وفاقی تحقیقاتی ایجنسی (ایف آئی اے) کو کرپٹ سیاستدانوں کو گدھے سے تشبیہ دینے والی سوشل میڈیا پوسٹس کے خلاف کارروائی کے لیے سیشن عدالت سے رجوع کیا ہے۔

 

وکیل نے نوٹ کا کہنا ہےکہ ایسی پوسٹس 'جانوروں کی عزت کو نقصان پہنچاتی ہیں'، اور ایف آئی اے سائبر کرائم سرکل کے ایڈیشنل ڈائریکٹر اور انچارج کو سرکاری مدعا کے طور پر نامزد کرتے ہوئے درخواست دائر کی۔

درخواست:

درخواست میں ان کا کہنا تھا کہ ایک بیرسٹر کا ویڈیو کلپ سوشل میڈیا پر وائرل ہوا جس نے کرپٹ سیاستدانوں کا موازنہ جانوروں بالخصوص گدھوں سے کیا۔ وکیل نے کہا کہ بیرسٹر نے اس حقیقت کو نظر انداز کیا کہ 'گدھے محنتی جانور ہیں اور کسی کو نقصان  نہیں پہنچاتے،' وکیل نے کہا۔ اپنی فیس بک پوسٹ کے ذریعے بیرسٹر نے لاڑکانہ میں بلدیاتی انتخابات کے لیے انتخابی مہم چلاتے ہوئے جانور کی عزت کو ٹھیس پہنچائی ہے۔

 

درخواست گزار نے مزید کہا کہ سوشل میڈیا صارف کے اس فعل سے معاشرے میں جانوروں کی بے عزتی کا ماحول پیدا ہوا ہے، اس کے خلاف پاکستان پینل کوڈ اور جانوروں پر ظلم کی روک تھام ایکٹ 1890 کی خلاف ورزی پر کارروائی کی جائے۔ جواب دہندگان کو سی آر پی سی کی دفعہ 154 کے تحت اپنے بیانات ریکارڈ کرنے اور ایف آئی آر درج کرنے کی ہدایت کرنے کی استدعا کی ہے۔

 

عدالت سے کہا گیا کہ وہ بیرسٹر کو اپنی غلطی تسلیم کرنے اور تحریری طور پر اپنےالفاظ واپس لینے کا حکم دے۔ ابتدائی سماعت کے بعد، ڈسٹرکٹ اینڈ سیشن جج (جنوبی) منور علی لودھی نے سرکاری جواب دہندگان کو 5 جولائی کو مقرر اگلی سماعت تک جواب جمع کرانے کے لیے نوٹس جاری کردیا۔